Абслугоўванне

Нумары Раённыя навіны

image_pdfimage_print

НА КАНВЕЕРЫ – ВІТАМІННАЯ ПРАДУКЦЫЯ

15-09-71d

На філіяле Гарадзейскага цукровага камбіната, што ў Стоўбцах, зараз сезонны «час пік» – самая гарачая пара нарыхтовак і перапрацоўкі багатых дароў мясцовых садоў і агародаў. На вытворчых лініях ідзе разліў сокаў, нектараў на любы густ пакупнікоў. У зручныя сучасныя ёмістасці расфасоўваюцца джэмы і павідла.

Фота Васіля ЗЯНЬКО

 

ПА ДЗЕВЯЦІ МАРШРУТАХ

Райспажыўтаварыства развівае гандаль, які ажыццяўляецца аўталаўкамі.

У гэтым сезоне распрацаваны дзевяць маршрутаў у нашым раёне, па якіх згодна з графікам адпраўляюцца ў рэйс 10 магазінаў на колах.

Гэтым летам вадзіцелі-прадаўцы працуюць надзвычай актыўна і вынікова. Яны абслугоўваюць як жыхароў аддаленых вёсак, так і гараджан, хто на летнія месяцы перасяляецца на свае дачныя ўчасткі.

Назіраецца такая тэндэнцыя: пастаянна ідзе прырост тавараабароту па аўтамагазінах. За жнівень нагрузка на адзін у сярэднім склала 21 тысячу 740 рублёў. А ў ліку лепшых вадзіцеляў магазінаў на колах – Міхаіл Шастак, які забяспечыў самы высокі тавараабарот – звыш 30 тысяч рублёў. Вялікі вопыт работы, адказнасць да даручанай справы, яго ўменні і ініцыятывы, беражлівыя адносіны да пакупнікоў даюць такі плён і высокі вынік.

Наведвальнікі аўтамагазінаў могуць набыць не толькі той тавар, які яны бачаць на прылаўках, але і заказаць усё, што ім патрэбна. Заказ даставяць ім дадому.

 

ГАТОВЫ ДА ВЫЕЗДУ

Як і ў мінулым годзе, аварыйная брыгада філіяла ВУ «Стоўбцыгаз» выйшла прызёрам фінальных спаборніцтваў у конкурсе прафесійнага майстэрства.

Аварыйныя брыгады УП «Мінскаблгаз» спаборнічалі на палігоне стаўбцоўскага газавага прадпрыемства. Састаў нашай брыгады быў тым жа, леташнім: слесар Мікалай Фурсевіч, вадзіцель Іван Якусік і майстар Аляксандр Кутас.

Да слова, калі назваць усю тройку прызёраў, то першае месца – у брыгады Салігорскгаза, а трэцяе – Маладзечнагаза, што, безумоўна, адразу гаворыць пра сур’ёзны дух саперніцтва сярод газавікоў і, адпаведна, высокі ўзровень прафесійнага майстэрства стаўбцоўскіх газавікоў. З зайздроснай стабільнасцю яны выступаюць на ўзроўні калегаў з буйных прамысловых гарадоў.

Стаўбцоўскія газавікі надаюць пытанням прафесійнага майстэрства асаблівую ўвагу. Для гэтага на прадпрыемстве ёсць і адпаведныя ўмовы – сучасны вучэбны палігон, які выкарыстоўваецца спаўна. А ўвогуле прафесійная і стабільная работа калектыву крыецца ў мэтанакіраванай дзейнасці па падрыхтоўцы кадраў і павышэнні іх кваліфікацыі, стварэнні кадравага рэзерву.

 

УБОРКА БУЛЬБЫ З ДАПАМОГАЙ ГАРАДЖАН

Упраўленне па працы, занятасці і сацыяльнай абароне насельніцтва райвыканкама арганізоўвае незанятых грамадзян на аплатныя грамадскія работы.

Транспартам аўтапарка № 17, заказаным службай занятасці, гараджане адпраўляюцца ў ААТ «Рубяжэвічы» на ўборку бульбы, у ААТ «Агранёманскі» – на пераборку бульбы.

Ёсць заяўка на ўборку бульбы з ААТ «Радзіма Дзяржынскага». У дзень на сельскагаспадарчыя работы ў гаспадаркі адпраўляецца да 50 чалавек.

 

ТРАНСПАРТ ЗАПАТРАБАВАНЫ

Стаўбцоўскі ўчастак Валожынскага філіяла «Мінаблпаліва» аказвае транспартныя паслугі насельніцтву і арганізацыям. Тэхніка працавала на ўборцы збожжавых у сельгаскааператывах. А ў гэтыя дні МАЗ з прычэпам задзейнічаны на адвозцы цукровых буракоў на Гарадзейскім цукровым камбінаце. Арганізацыя мае такі заказ на ўсю восень. Цяпер МАЗ адвозіць прадукцыю з ААТ «Радзіма Якуба Коласа».

Аднак асноўнай дзейнасцю філіяла з’яўляецца забеспячэнне палівам насельніцтва і арганізацыі. На сучасны момант на дровы і торфабрыкеты няма чаргі, і філіял пры наяўнасці заказаў мог бы працаваць у больш напружаным рабочым рытме. Многія арганізацыі сацыяльнай сферы – адукацыі, аховы здароўя, культуры – не маюць складскіх памяшканняў, таму цвёрдыя віды паліва ў ацяпляльны сезон завозяць па меры неабходнасці. А вось насельніцтву адкладваць завоз паліва на мокрыя восеньскія месяцы неабачліва, лепш паклапаціцца пра гэта загадзя.

Паралельна ідзе лесанарыхтоўка на дровы на лесаўчастках. Філіял мае ўсю неабходную тэхніку і працоўныя рэсурсы, каб выконваць гэтую задачу без пасрэднікаў.

 

АД НУЛЯВОГА КІЛАМЕТРА

У бягучым годзе дарожнікі ДРБУ № 135 завяршылі асфальтаванне ўчастка дарогі Літва – Куль – Пятрылавічы (у вёсцы Слабодка) і чакаюць выхаду праекта на правядзенне аналагічных капітальных работ на ўчастку вуліцы Трактарнай у Новым Свержані.

Як адзначае дырэктар прадпрыемства Вадзім Савіцкі, праектная дакументацыя павінна быць напрыканцы верасня, а пакуль на дарогах мясцовага значэння вядуцца бягучыя рамонты і работы па іх утрыманні. Да прыкладу, выкананы бягучы рамонт з паверхневай апрацоўкай участка дарогі Стоўбцы – Мікалаеўшчына (ад граніцы Стоўбцаў да паварота на Сверынава), участка дарогі Пагарэлае – Вішнявец (ад нулявога кіламетра да другога кіламетра).

Акрамя таго, дарожнікі працуюць над добраўпарадкаваннем вуліц райцэнтра згодна з прамымі дагаворамі, заключанымі з аб’яднаннем камунальных службаў. На вуліцы А. Кашавога працягнута абсталяванне пешаходнай дарожкі (ад былога прадпрыемства меліярацыйных сістэм да мікрараёна Акінчыцы), асфальтуецца вуліца Мамантава. На тэрыторыі філіяла ААТ «ККХ «Мінскі маторны завод» у г. Стоўбцы дарожнікі працуюць ужо не першы год. Тут шмат зроблена для добраўпарадкавання тэрыторыі новай вытворчасці высокадакладнага, высокатрывалага чыгуннага ліцця. Асфальтаванне адной з пляцовак плануецца і на новым малочна-таварным комплексе ААТ «Вішнявецкі-агра» ў Вішняўцы.

У ДРБУ вядзецца і падрыхтоўка да зімы. Ідзе рамонт пескаразмеркавальнага навяснога абсталявання – яго ў арганізацыі пяць адзінак, да зімы плануецца папаўненне на яшчэ адну. Для прыгатавання супрацьгалалёднай сумесі неабходна нарыхтаваць 1,5 тысячы тон солі і 5,8 тысячы тон пяску. Палова пясчаных загатовак ужо зроблена.

Пр

 

НЕ ПАШАНЦАВАЛА

У розных жыццёвых сітуацыях тым, каму не шанцуе, часцей выказваюць спагаду. А вось у спорце вывады звычайна катэгарычныя: умелым, моцным, упэўненым заўсёды шанцуе.

Дык як тады расцаніць вынік выезду каманды «Нёман-Агра» ў Магілёў? Ужо на другой хвіліне матча Алег Каракін, ліквідуючы небяспечны выхад нападаючага мясцовага «Тарпеда», зразае мяч ва ўласныя вароты. На 36-й хвіліне матча гаспадары падвойваюць лік. Тут жа Дзмітрый Даўбейка праводзіць адзін мяч у адказ – 2:1 вядзе «Тарпеда».

У другім тайме гульня вялася на сустрэчных курсах. У стаўбчан былі выгадныя моманты, але яшчэ адзін трапны ўдар удаўся магіляўчанам – 3:1. Нашы ўзмацняюць націск, усімі сіламі гаспадары поля стараюцца яго стрымаць. Тры ігракі «Тарпеда» атрымліваюць за парушэнне правілаў папярэджанні. Прызначаецца і пенальці, які рэалізуе Дзмітрый Даўбейка. Але гэта быў ужо дабаўлены да асноўнага час. І гульня заканчваецца з лікам 3:2 на карысць каманды з Магілёва.

Паражэнне, і «Нёман-Агра» зноў апускаецца на сёмае месца ў турнірнай табліцы. Што ж, пачакаем больш удалых дзён і зручных сапернікаў.

Ф. ФЯДОТАЎ



Tagged

Добавить комментарий

Ваш e-mail не будет опубликован. Обязательные поля помечены *