Праца ў сваёй акрузе

Нумары Соцыум

Заканчваецца 2016 год. Для мяне ён стаўся знакавым, бо жыхары Стаўбцоўскага і Нясвіжскага раёнаў аказалі мне вялікі давер і выбралі дэпутатам Палаты прадстаўнікоў Нацыянальнага сходу Рэспублікі Беларусь. З 11 кастрычніка я прыступіла да сваіх абавязкаў менавіта ў гэтым статусе. Хачу зрабіць невялікі агляд таго, што ўжо зроблена. За гэты час я правяла чатыры прыёмы: два ў Стоўбцах і два ў Нясвіжы. Акрамя таго, з 8 лістапада мой памочнік Новік Мікалай Мікалаевіч вёў прыём у Стоўбцах кожны аўторак (з 09.00 да 12.00) і чацвер (з 15.00 да 17.00).

Падчас прыёмаў людзі звярталіся па розных пытаннях: некаму трэба было дапамагчы з працаўладкаваннем, іншыя мелі клопаты, звязаныя са станам дарог, кагосьці турбавала закрыццё аддзялення Беларусбанка ў аддаленым аграгарадку, праца ЖКГ таксама час ад часу выклікае нараканні жыхароў. Многія з гэтых пытанняў ужо вырашаны дзякуючы дзейнасці кіраўнікоў будаўніча-рамонтных і іншых арганізацый. Старшыні Стаўбцоўскага і Нясвіжскага раённых Саветаў дэпутатаў Казякоўскі А. Р. і Лазюк В. М. таксама дапамагалі ў вырашэнні праблем, якія хвалююць людзей. Таму хачу выказаць шчырую падзяку ўсім, хто на сваім узроўні дапамог людзям у іх жыццёвых сітуацыях.

1-23-24a

Не магу не сказаць таксама некалькі слоў пра дзейнасць аргкамітэта па арганізацыі краязнаўчага музея ў Стоўбцах, што быў створаны па маёй ініцыятыве згодна з рашэннем удзельнікаў канферэнцыі. У яго склад увайшлі прадстаўнікі райвыканкама, настаўнікі гісторыі, мясцовыя краязнаўцы і грамадскія актывісты. На цяперашнім этапе вядзецца пошук адпаведнага памяшкання, збор экспанатаў. Наперадзе шмат работы, хочацца, каб яна была выніковай і паспрыяла развіццю Стоўбцаў і ўсяго раёна.

У Гарадзеі напрыканцы года атрымаўся сапраўдны калядны падарунак, які для ўсіх зрабіла кіраўніцтва Беларускай чыгункі: з 11 снежня тут спыняецца хуткасны электрацягнік рэгіянальных ліній. Мясцовыя ўлады падымалі гэтае пытанне на сваім узроўні, такую ж просьбу людзі агучвалі падчас выбарчай кампаніі, і іх голас быў пачуты, што вельмі прыемна, асабліва напярэдадні навагодніх святаў. Такія факты сведчаць пра тое, што ў нашай краіне ёсць кіраўнікі, якія ў сваёй прафесійнай дзейнасці арыентуюцца на патрэбы людзей, здольныя чуць іх і вырашаць адпаведна кампетэнцыі. Гэта выклікае павагу і ўдзячнасць. Бо такія людзі па праву займаюць сваё месца.

Так атрымліваецца, што на маё імя як дэпутата Палаты прадстаўнікоў прыходзяць звароты і ад людзей з іншых гарадоў нашай краіны, а не толькі з маёй выбарчай акругі. Таму частку свайго часу выдзяляю і на гэта, хоць у фокусе маёй дзейнасці найперш запыты жыхароў Стаўбцоўскага і Нясвіжскага раёнаў.

У перыяд з кастрычніка па снежань я мела магчымасць удзельнічаць у тэлеперадачах, у якіх абмяркоўваліся актуальныя пытанні развіцця нашай краіны. Таксама брала ўдзел у імпрэзах, на якія мяне запрашалі паслы розных еўрапейскіх краін. Спадзяюся, што такія кантакты дапамогуць мне ў маёй дэпутацкай дзейнасці.

Гэта значная частка ўжо праведзенай дэпутацкай работы, але не ўся. Наперадзе яшчэ шмат спраў, у тым ліку і па прапановах грамадзян, што ўжо паступілі на маё імя, аб змяненні некаторых заканадаўчых нормаў.

За гэты перыяд я пераканалася ў тым, што ў Беларусі і канкрэтна ў маёй выбарчай акрузе шмат актыўных людзей, неабыякавых да лёсу сваёй краіны, і яны праз свае звароты і запыты патрабуюць адказнага стаўлення да вырашэння актуальных пытанняў ад розных асоб, у тым ліку і ад дэпутатаў Палаты прадстаўнікоў. І я ўпэўнена, што такое супрацоўніцтва прынясе плён і дапаможа наладзіць наша жыццё ў краіне да лепшага.

Алена Анісім, дэпутат Палаты прадстаўнікоў Нацыянальнага сходу Рэспублікі Беларусь па Стаўбцоўскай выбарчай акрузе № 70 



Tagged

Добавить комментарий

Ваш e-mail не будет опубликован. Обязательные поля помечены *