Для дабрабыту людзей

Калонка дэпутата Нумары

image_pdfimage_print

1312

На прыём грамадзян да члена Савета Рэспублікі Нацыянальнага сходу Рэспублікі Беларусь Мікалая Радамана звярнуліся восем чалавек. Два пытанні насілі індывідуальны характар. Яны патрабуюць дэталёвага вывучэння і разгляду.

Жыхарка г. Стоўбцы М. звярнулася да Мікалая Вячаслававіча з вельмі набалелым і хвалюючым для яе пытаннем. Жанчына пражывае адна, сваякоў ці блізкіх людзей у яе няма. Паводле Указа Прэзідэнта № 75 карыстаецца льготным крэдытам на капітальны рамонт дома. Жанчына мае чэкі «Жыллё» і хацела б іх праіндэксаваць. Што ёй рабіць з гэтымі чэкамі, куды звярнуцца?

–             На жаль, дапамагчы вам у гэтым пытанні мы не можам. Чэкі «Жыллё» індэксуюцца пры іх выкарыстанні грамадзянамі і членамі іх сем’яў, якія стаяць на ўліку тых, хто мае патрэбу ў паляпшэнні жыллёвых умоў, для аплаты паявога ўзносу ў жыллёвым ці жыллёва-будаўнічым кааператыве, фінансавання індывідуальнага ці калектыўнага жыллёвага будаўніцтва, рэканструкцыі жылых дамоў, долевага ўдзелу ў жыллёвым будаўніцтве, пакупкі жылля, а таксама для пагашэння запазычанасці па крэдытах банка (уключаючы выплату працэнтаў за карыстанне імі) і пазыках юрыдычных асоб, ужытых і выкарыстаных на ўказаныя мэты (пастанова Савета Міністраў Рэспублікі Беларусь ад 15.11.2006, № 1529 «Аб мерах па рэалізацыі Дэкрэта Прэзідэнта Рэспублікі Беларусь ад 23 жніўня 2006 г. № 13»), – растлумачыў Мікалай Радаман.

Грамадзяніна Я. з вуліцы Мічурына г. Стоўбцы хвалюе пытанне работы АКС: рамонт лазні ў г. Стоўбцы, грэйдзіраванне вул. Мічурына, адкрытыя водакалодзежы па вул. Гайдука.

Мікалай Радаман даручыў на працягу трох дзён прагрэйдзіраваць вуліцу і ўстанавіць накрыўкі на водакалодзежы на працягу двух дзён. Наконт рамонту лазні дырэктар АКС Д. Мурын растлумачыў: «Лазня рамантуецца тры тыдні. На наступныя выхадныя (16-17 снежня) лазня будзе працаваць». Што ж, будзем чакаць «лёгкай пары».

Наконт звароту да члена Савета Рэспублікі Нацыянальнага сходу Рэспублікі Беларусь па пытанні ўключэння лазняў у сацыяльна значныя аб’екты, якія датуюцца з бюджэту, Мікалай Радаман паведаміў, што ён напісаў пісьмо ў Савет Рэспублікі. Цяпер зварот знаходзіцца ў Савеце Міністраў і будзе разгледжаны на сесіях да канца бягучага года.

Грамадзянін Д. з вёскі Старына Стаўбцоўскага раёна цікавіўся, ці можа ён карыстацца вадзіцельскім пасведчаннем Расійскай Федэрацыі на тэрыторыі Беларусі. Таксама падымаў пытанні грэйдзіравання і асвятлення вуліц Лугавой і Школьнай у в. Старына, адкрыцця аўтобуснага маршрута Стоўбцы – Старына (ці праездам праз Старыну) у абедзенны час.

Старшыня савета ветэранаў Старасвержанскага сельсавета У. І. Шчарбацэвіч прыехаў на прыём да Мікалая Вячаслававіча са словамі падзякі за станоўчае вырашэнне пытання аб выдзяленні ААТ «Агранёманскі» збожжа ветэранам вайны і працы.

Падводзячы вынікі працы, Мікалай Вячаслававіч рэзюмаваў: «Да мяне як члена Савета Рэспублікі на прыём прыйшлі грамадзяне па пытаннях работы ЖКГ, але гэтыя пытанні павінны хутка вырашыцца, бо з такімі праблемамі, як грэйдзіраванне, прывядзенне ў належны стан калодзежаў, патрэбна звяртацца ў мясцовыя адміністрацыйныя органы кіравання. Ёсць пытанні і вельмі важныя, якія патрабуюць дадатковага вывучэння і вырашэння на ўзроўні Адміністрацыі Прэзідэнта Рэспублікі Беларусь.

Радуе, што мясцовая адміністрацыя прыслухоўваецца да маіх заўваг і пажаданняў і што мы сёння ў тандэме працуем для дабрабыту людзей».

P. S. У той жа дзень, калі праходзіў прыём грамадзян, работнікі Стаўбцоўскага АКС прагрэйдзіравалі вул. Мічурына і закрылі водакалодзеж па вул. Гайдука ў Стоўбцах.

Усе пытанні, што падымаліся падчас прыёму грамадзян, узяты на кантроль і будуць разгледжаны ў межах заканадаўства.

Нэлі АСТРЭЙКА

Фота Васіля ЗЯНЬКО



Tagged

Добавить комментарий

Ваш e-mail не будет опубликован. Обязательные поля помечены *