У сельгаставарыствах

Нумары Сельская гаспадарка

image_pdfimage_print

САЛОДКІЯ ГЕКТАРЫ

Буракасеючымі гаспадаркамі раёна сёлета перавыкананы дзяржзаказ па пастаўках салодкіх каранёў на Гарадзейскі цукровы камбінат. Усяго да канца года перапрацоўшчыкам будзе рэалізавана звыш 143 тысяч тон сыравіны ў заліковай вазе. У раёне вырошваюць цукровыя буракі дзевяць сельгаспрадпрыемстваў. Пад гэтай прапашной культурай было занята тры тысячы гектараў. Ураджайнасць цукровых буракоў атрымана даволі высокая, у сярэднім кожны гектар аддзячыў 516,7 цэнтнера. Удалося вырасціць і сабраць высокі ўраджай дзякуючы шчырай працы аграрыяў, строгаму выкананню тэхналогіі вырошчвання цукровых буракоў. Паспрыяла буракаводам і надвор’е. Самая высокая ўраджайнасць, як і ў папярэднія гады, атрымана ў ААТ «Вялікі Двор», дзе накапана 650 цэнтнераў з гектара. Варта таксама адзначыць, што ў гэтай гаспадарцы з году ў год цукровыя буракі рэнтабельныя. Другі і трэці паказчыкі ў ААТ «Рубяжэвічы» і «Радзіма Якуба Коласа», адпаведна 589 і 584 цэнтнеры. Цукрыстасць каранёў вышэйшая за базісную і складае па раёне 16,8 працэнта, а ў ААТ «Вішнявецкі-агра» – амаль 17,2 працэнта.

 

У РЭЖЫМЕ РЭВЕРСА

Уборка кукурузы ў гаспадарках раёна сёлета затрымалася, і пасля працяглых асенніх дажджоў праходзіла ў складаных умовах – на некаторых участках камбайны не маглі праехаць. Таму ў СГФ «Аталезь-агра» ААТ «Стаўбцоўскі райаграсэрвіс» кукурузу на сілас на пераўвільготненых глебах убіралі з дапамогаю магутнага энерганасычанага трактара «Беларус-3522». Нестандартны выхад прапанавалі ва ўпраўленні сельскай гаспадаркі і харчавання райвыканкама. А іменна, была скарыстана магчымасць данай тэхнікі працаваць у рэжыме рэверса: трактар мае дадатковую рулявую калонку, дубліраванае кіраванне счапленнем, тармазамі, падачай паліва і спецыяльнае паваротнае сядзенне для работы «задам-наперад». Ад кормаўборачнага камбайна КПК-3000 ззаду трактара прычапілі паўнавясную жняярку, што дазволіла ўбраць кукурузу максімальна.

 

НА АДПАВЕДНАСЦЬ СТАНДАРТУ

У раслінаводчай галіне раёна апошнім часам надаецца вялікая ўвага насенняводству шматгадовых траў. Сельгаспрадпрыемствамі намалочана сёлета 147,2 тоны бабова-злакавых траў. Больш за іншых у ААТ «Агранёманскі» – амаль 50 тон. Няблага спрацавалі ў гэтым плане агранамічныя службы ААТ «Шашкі», «Вялікі Двор» і «Рубяжэвічы». На складах гаспадарак актыўна вялася яго ачыстка, і пасля дасушвання атрымана 86 тон насення, якое зараз даводзіцца да адпаведных кандыцый. У шэрагу сельгаставарыстваў гэтая тэхналагічная аперацыя выконваецца на ўласных спецыяльных машынах, іншыя карыстаюцца паслугамі, якія прадастаўляюць ТАА «Насенне траў», Уздзенскі райаграсэрвіс і іншыя. Гэтымі днямі насенне паступае на праверку на адпаведнасць патрабаванням пасяўнога стандарту ў раённую дзяржаўную інспекцыю па насенняводстве, каранціне і ахове раслін, якую, паводле слоў начальніка Таццяны Шапецька, да канца года плануецца завяршыць.

 

ВЫСАКАЯКАСНАЯ СЫРАВІНА

Для вызначэння якасных паказчыкаў малака на малаказаводах праводзіцца некалькі даследаванняў. Мікрабіялагічнае – на яго бактэрыльнае засейванне (рэдуктаза). Бярэцца проба на ўтрыманне ў сыравіне колькасці саматычных клетак. Сычужна-брадзільная робіцца на прыдатнасць малака для вырабу сыроў. Вельмі важны і такі фізіка-хімічны паказчык, як тэрмаўстойлівасць – прыдатнасць да высокатэрмічнай апрацоўкі. Для кожнага класа малака існуюць спецыяльна вызначаныя нарматыўныя паказчыкі, згодна з якімі сыравіна адносіцца да гатунку «экстра», вышэйшага або першага. І аплата за кожны адпаведная. Малако з палепшанымі, звышнарматыўнымі паказчыкамі, перапрацоўшчыкі называюць «суперэкстра» і плацяць за яго больш. Такое малако выкарыстоўваецца пераважна для вырабу дзіцячага харчавання. З нашага раёна на ААТ «Мінскі малочны завод № 1» пэўную колькасць такой высакаякаснай сыравіны пастаўляе ААТ «Каганец».

Надзея БАТАЛКА



Tagged

Добавить комментарий

Ваш e-mail не будет опубликован. Обязательные поля помечены *