Усё больш электронных зваротаў

Нумары Соцыум

У бліжэйшай перспектыве большасць арганізацый будзе мець уласныя сайты, і гэта дасць магчымасць звяртацца для вырашэння сваіх пытанняў у тым ліку і праз электроннае пісьмо.

Законам Рэспублікі Беларусь «Аб зваротах грамадзян» рэагаванне на электронны зварот прадугледжана такое ж, як і на пісьмовы. Заяўніку неабходна даць электронны адказ, а, па яго просьбе, і пісьмовы. Адказ павінен быць на той дзяржаўнай мове, на якой паступіў зварот. На гэтыя і іншыя нюансы ў рабоце са зваротамі грамадзян і юрыдычных асоб была звернута ўвага падчас вучобы са спецыялістамі прадпрыемстваў і арганізацый раёна.

– Электронных зваротаў становіцца ўсё больш, таму работа з імі павінна ўдасканальвацца, – падкрэсліваюць кіраўнік спраў райвыканкама Ала Янкоўская і загадчыца сектара па рабоце са зваротамі грамадзян і юрыдычных асоб райвыканкама Вольга Навіцкая. – У рабоце са зваротамі грамадзян, вядзенні справаводства неабходна карыстацца нарматыўнымі дакументамі і, у першую чаргу, патрабаваннямі Дырэктывы № 2 «Аб мерах па далейшай дэбюракратызацыі дзяржаўнага апарату».

Паводле вынікаў маніторынгу і праверак работы са зваротамі ў арганізацыях і на прадпрыемствах раёна за мінулы год, пракуратурай раёна падрыхтавана інфармацыя, якая і была разгледжана падчас вучобы. На канкрэтных прыкладах зроблены аналіз асноўных недахопаў, якія дапускаюцца пры разглядзе зваротаў грамадзян і юрыдычных асоб. Іх прычынамі з’явіліся фармалізм, валакіта, непрыманне мер, нерастлумачэнне заяўніку парадку абскарджвання рашэння, парушэнне парадку вядзення справаводства і т. п. Дарэчы, пракуратурай унесена пяць прадстаўленняў, у ходзе іх разгляду шэсць службовых асоб прыцягнуты да дысцыплінарнай адказнасці.    

У прыватнасці, увага звернута на кнігу заўваг і прапаноў, інфармацыя аб знаходжанні якой і адказных за яе захоўванне і вядзенне павінна пастаянна падтрымлівацца ў актуальным стане. Заяўніку, які зрабіў у гэтай кнізе свой запіс, неабходна даслаць адказ. Як і адказ на любы са зваротаў, ён павінен быць аргументаваным, поўным.

Зварот «не па адрасе» ці пакінуты без разгляду і перасланы ў кампетэнтны орган, з адмоўным адказам – таксама прадугледжвае тое, што яго заяўнік павінен атрымаць адказ. У інфармацыі аб парадку абскарджання неабходна канкрэтна ўказваць орган, у якім гэта можна зрабіць. Вельмі важнае пытанне ў рабоце са зваротамі – захаванне вызначаных тэрмінаў рэагавання, дачы адказу, што служыць перадумовамі для своечасовага і дзейснага рэагавання. Месяц – максімальны тэрмін для адказу на зварот, пры ўмове, што ён патрабуе дадатковага вывучэння, у прыватнасці, выезду на месца. Выезд ажыццяўляецца на працягу 15-ці дзён з выдачай заяўніку прамежкавага адказу.  

– На прадпрыемствах і ў арганізацыях павінен быць наладжаны кантроль за выкананнем патрабаванняў заканадаўства як у плане захавання тэрмінаў адказаў на звароты, так і выканання рашэнняў, якія былі вынесены ў адносінах да таго ці іншага звароту. Важна таксама кантраляваць выкананне графіку прыёму грамадзян кіраўніцтвам арганізацыі ці прадпрыемства, – нагадала Ала Янкоўская.

Работа са зваротамі грамадзян набывае і новыя сучасныя формы. Так, цікавай навінкай павінна стаць стварэнне партала ацэнкі якасці паслуг. Гэтая пляцоўка дасць магчымасць кожнаму з нас выказваць сваю ацэнку любой арганізацыі, якая аказвае паслугі на тэрыторыі рэспублікі і, такім чынам, уплываць на яе работу. Пакуль вядзецца напаўненне новага партала. Больш эфектыўнай зваротнай сувязі паспрыяе і пераход дзяржаўных органаў да канца бягучага года на сістэму міжведамаснага электроннага дакументаабароту.

Таццяна ПЯТКЕВІЧ



Tagged

Добавить комментарий

Ваш e-mail не будет опубликован. Обязательные поля помечены *