Помніць – цяжка, забыць – страшна

Вялікай Перамозе прысвячаецца Культура

Дзеці і вайна – нешта несумяшчальнае… Але дзеці вайны, якіх вы бачыце, нібыта абвяргаюць гэта. Яны не плачуць – яны пяюць аб міры і каханні.

Спяваюць вязні фашысцкіх канцэнтрацыйных лагераў

Чарговы раз наведаўся да стаўбчан квартэт «Чатыры сяброўкі», што створаны пры грамадскім аб’яднанні малалетніх вязняў фашысцкіх канцэнтрацыйных лагераў г. Мінска «Памяць сэрца». У ім Таісія Сотнікава, прафесіянал сваёй справы, не толькі акампаніруе, але і спявае. Дапамагаюць ёй вялікія аматары песні – Аляксандра Залівака, Людміла Герман і Лілія Мясніковіч. Людміла Герман – яшчэ і майстар размоўнага жанру, яна піша гумарэскі на злобу дня…

Стаўбчанін Мікалай Данец выказвае свае пачуцці былым малалетнім вязням

Праз лёс удзельніц квартэта «Чатыры сяброўкі» прайшла вайна, але жахі ваеннага ліхалецця не азлобілі сэрцы, а напоўнілі іх пазітывам і творчасцю. І публіка, якая вітала артыстак у зале тэрытарыяльнага цэнтра, – гэта ў большасці таксама дзеці вайны, яе малалетнія сведкі. У тэрытарыяльным цэнтры яны наведваюць аддзяленне дзённага знаходжання для грамадзян пажылога ўзросту, бяруць удзел у рэалізацыі праекта «Актыўнае даўгалецце». Ад імя прысутных Мікалай Данец, былы ваенны і ўдзельнік хору народнай песні «Родны кут», пакланіўся ў пояс жанчынам з «Чатырох сябровак». Адна з іх, Аляксандра Залівака, падзялілася, што ёй давялося перажыць у фашысцкім канцэнтрацыйным лагеры…

Загадчык аддзялення Сяргей Есіс яшчэ запрасіў на сустрэчу сваіх даўніх сяброў з раённага цэнтра народнай творчасці – Марыну Халецкую і Алу Янскую. Іх выступленне адкрывала праграму і адразу «накіравала» ў той, пасляваенны, час. Марына Халецкая падрыхтавала лялькі-абярэгі, якія нагадалі прысутным пра іх колішнія цацкі і забавы. Майстар падаравала лялькі гасцям на памяць і правяла невялікі майстар-клас.

– У зале не было абыякавых. Усе разам спявалі, суперажывалі, дзяліліся  сваёй шчырасцю. Аб’яднала нас памяць сэрца, – падвёў вынік Сяргей Есіс.

Таццяна ПЯТКЕВІЧ, фота аўтара



Tagged

Добавить комментарий

Ваш e-mail не будет опубликован. Обязательные поля помечены *