Свята вёскі прайшло ў Кучкунах

Главное Год малой родины

У мінулую суботу ў Кучкунах ладзілася свята вёскі. Юбілейнае, пяцідзясятае з пачатку правядзення такіх мерапрыемстваў у раёне. На сваёй малой радзіме гасцей сустракалі хлебасольныя жыхары вёскі, якія шчыра падрыхтаваліся, навялі на вуліцах і вакол сядзіб парадак.

Каравай Уладзіміру Гарохавіку ўручае Тамара Пяткевіч
Валянціна Гусачонак сустракае гасцей

Свята сабрала многіх, каго родны кут хвалюе, заклікае зноў сюды вяртацца. Да бацькоў прыехалі дзеці з унукамі. У дружнай вясковай сям’і і тыя, хто купіў тут дамы і жыве на працягу не аднаго дзесяцігоддзя. Гаспадары праявілі фантазію, накрылі сталы. Зрабілі выставы твораў мясцовых майстроў. Галоўнае, што ўсё ад душы, ад імкнення паказаць, чым багата вёска, дзе жывыя традыцыі, заўсёды ў пашане ўмельства.

Сустракаюць гасцей сем’і старасты Сяргея Віцько, Уласікаў і Боханаў

Шэсце пачалося з вуліцы Палявой. Першы стол накрылі сем’і Малахавых – Пяткевічаў. Гасцінна сустракала гасцей сям’я старасты вёскі Сяргея Віцько разам з суседзямі Уласікамі і Боханамі. Вуліцу Школьную прадставілі сем’і Гусачонкаў, Вайцяховічаў, Новікаў, Драздоў, Шульга, Данічавых, Гацураў. Карані вёскі – старэйшыны, якія перажылі голад і нястачу, разам будавалі мірнае жыццё. Гасцінна расчынілі веснічкі Леанід і Зінаіда Лапко, Людміла Яшкова, Ганна Грамыка, увесь працоўны шлях якіх звязаны з мясцовай гаспадаркай. Віталі прадстаўнікоў райвыканкама і мясцовай улады Боханы і Маліноўскія, Наронскія, Собалевы, Кульгавікі… Заклікалі ў аграсядзібу «Конная застава» яе гаспадары, у гэтай хаце, дарэчы, пражывае самая старэйшая жыхарка вёскі Валянціна Някрасава.

Затым свята працягнулася на імправізаванай сцэне. Ураджэнец вёскі Генадзій Уласік падрабязна расказаў пра гісторыю яе ўзнікнення і звярнуўся да  жыхароў з прапановай увекавечыць свой родны кут – паставіць памятны камень з мармуровай плітой і пасадзіць восенню дубы.

Хвілінай маўчання былі ўшанаваны тыя, хто са зброяй у руках змагаўся на франтах Вялікай Айчыннай вайны.

Прэзентуе карціны мастачка Галіна Собалева
Гаспадары аграсядзібы «Конная застава»

Як адзначыў старшыня райсавета дэпутатаў Сяргей Шэсцель, у Кучкунах жывуць працалюбівыя, творчыя людзі з адметнай гісторыяй, культурай, традыцыямі, багатай спадчынай. Старшыня Заямнаўскага сельвыканкама Уладзімір Гарохавік дадаў, што вёска гэтая – адна з найпрыгажэйшых мясцін Стаўбцоўшчыны, а свята яднае ўсе яе пакаленні.

Генадзій Уласік расказвае гісторыю вёскі
Спяваюць удзельнікі вакальнага ансамбля «Світанак»

Біяграфія вёскі складаецца з лёсаў, працоўных спраў яе жыхароў. Падарункі за шматгадовую працу атрымалі 14 былых работнікаў мясцовай гаспадаркі, а таксама тыя, хто працавалі і сёння шчыруюць у гарадскіх арганізацыях. Ушанавалі і самую маленькую жыхарку – паўтарагадовую Васілісу Малахаву.

Валянціна Сачок, Тамара Шульга і Ганна Грамыка

Музычныя віншаванні вяскоўцам гучалі ля падворкаў і са сцэны. Выступалі фальклорны гурт «Яблынька» Стаўбцоўскага цэнтра народнай творчасці, народны вакальны ансамбль «Святланы» і народны ансамбль народнай музыкі «Славяначка» Наваколасаўскай дзіцячай школы мастацтваў, вакальны ансамбль «Світанак» Наваколасаўскага цэнтра культуры.

Жыхары вёскі задаволены канцэртнай праграмай

Надзея БАТАЛКА, фота аўтара



Tagged

Добавить комментарий

Ваш e-mail не будет опубликован. Обязательные поля помечены *