Абсталявалі трэнажорную залу

Нумары Раённыя навіны

У Старым Свержані пачала працаваць трэнажорная зала, куды прыходзяць падлеткі, мясцовыя жыхары і іншыя жадаючыя.

Больш за год ішло абсталяванне падвальнага памяшкання, размешчанага ў Старасвержанскім Цэнтры культуры. Калісьці там знаходзілася більярдная, але апошнім часам вялікае памяшканне проста пуставала. Работнікі інспекцыі па справах непаўналетніх вырашылі адрамантаваць яго сваімі рукамі – з прыцэлам, што трэнажорная зала прыцягне з вуліцы ў першую чаргу так званых цяжкіх падлеткаў, асабліва ў летні канікулярны перыяд, калі важна заняць кожнага  непаўналетняга, калі міліцыя  сумесна з зацікаўленымі службамі праводзіць міжведамасную прафілактычную акцыю «Клопат».

Па дапамогу звярнуліся да дырэктара ААТ «Агранёманскі» Іосіфа Меляшкевіча, які ва ўсім падтрымаў нас. З дапамогай гаспадаркі  закуплены спортінвентар, сантэхніка для душавога пакоя  і туалета, неабходныя будаўнічыя матэрыялы. Электрык гаспадаркі дапамог зрабіць у зале асвятленне.

У трэнажорнай зале ўстаноўлены комплексны сілавы трэнажор для ўсіх груп мышцаў, велатрэнажоры, ёсць баксёрская груша, штанга. Супрацоўнікі інспекцыі прынеслі з дому гантэлі, іншыя спартыўныя прыстасаванні. Мясцовая школа падзялілася тэнісным сталом, а Цэнтр культуры закупіў на ўсю сцяну люстэркі. Заняткі з падлеткамі ў трэнажорнай зале – бясплатныя, а праводзіць іх работніца Цэнтра культуры Ірына Крывіцкая.

Самы галоўны вынік – трэнажорная зала, зробленая агульнымі намаганнямі, не пустуе.  

Міхаіл ТУРКО, інспектар інспекцыі па справах непаўналетніх райаддзела міліцыі



Tagged

Добавить комментарий

Ваш e-mail не будет опубликован. Обязательные поля помечены *