Працаўнікі ААТ «Агранёманскі» пачалі рыхтаваць тэхніку да пасяўной

Главное Сельская гаспадарка

Пасля завяршэння ўсіх асенніх палявых работ працаўнікі ААТ «Агранёманскі» адразу прыступілі да рамонту тэхнікі, якая будзе задзейнічана на веснавых палетках. Сельгасмашыны і абсталяванне адпрацавалі сезон у складаных палявых умовах і цяпер патрабуюць асаблівай увагі. Па словах галоўнага інжынера Аляксандра Крывяля, да канца студзеня работа гэтая будзе завершана.

Галоўны інжынер Аляксандр Крывель (у цэнтры) ставіць задачу слесару Вячаславу Міхаленю і механізатару Дзмітрыю Сагайдакевічу

– Нашы працаўнікі ведаюць: ад таго, як будзе падрыхтавана тэхніка, залежыць і тэрмін яе работы, і эфектыўнасць выкарыстання, таму прыкладаюць старанні. Глебаапрацоўчая і пасяўная тэхніка практычна гатова, – расказвае Аляксандр Віктаравіч. – Застаецца паставіць на лінейку гатоўнасці адзін камбінаваны пасяўны агрэгат. Іх у нас два. Прапрацоўваецца пытанне купіць у лізінг і новы, сучасны. Патрабуюць рамонту кукурузная і дзве цукровабурачныя сеялкі. Сельгасмашыны для ўнясення арганічных і мінеральных угнаенняў таксама даведзены да ладу. Палі ў гаспадарцы доўгія, таму на спецмашыне «Раса» плануем устанавіць дадатковую ёмі-стасць для вадкіх мінеральных угнаенняў, каб зменшыць колькасць заправак. Цяпер упор робім на рамонт трактароў. У пасяўной кампаніі будуць задзейнічаны і сем энерганасычаных. Затым чарга дойдзе і да аўтамашын.

Электрагазасваршчык Аляксандр Семянкевіч

Рамонт выконваецца ў гаспадарцы сваімі сіламі. У майстэрні створаны ўсе ўмовы для працы. Даводзяць тэхніку да ладу механізатары, за якімі замацаваны трактары і агрэгаты, дапамагаюць ім работнікі гэтага вытворчага падраздзялення – токар, слесары, электрагазазваршчык. На запчасткі кіраўніцтва выдзяляе неабходную суму грошай. Адрамантаваныя сельгасагрэгаты захоўваюцца пад павецямі.

Механізатары Віктар Семянько (справа) і Аляксандр Ханчэўскі

Надзея БАТАЛКА, фота аўтара



Tagged

Добавить комментарий

Ваш e-mail не будет опубликован. Обязательные поля помечены *