У ААТ «Радзіма Якуба Коласа» адна з лепшых у раёне ўраджайнасць кармавых палеткаў

Главное Сельская гаспадарка

У ААТ «Радзіма Якуба Коласа» адна з лепшых сярод гаспадарак раёна ўраджайнасць кармавых палеткаў. З кожнага гектара атрымліваюць 120 цэнтнераў зялёнай масы.

На дзень наведвання таварыства травы былі скошаны на дзвюх трэціх плошчаў. На ўмоўную галаву жывёлы прыпадала каля 4,2 цэнтнера кармавых адзінак.

Работа ў корманарыхтоўшчыкаў спорыцца

Кормаўборачны атрад працаваў за вёскай Жыгалкі. Дырэктар таварыства Юрый Тарасевіч задаволены тэмпамі ўборкі і неблагім ураджаем траў.

– Асабліва радуе травасумесь «кантры», у якой утрымліваецца звыш 23 працэнтаў пратэіну, – падкрэслівае кіраўнік.

Разлічваюць сёлета запоўніць сенажом восем траншэй. На камбайнах завіхаліся Генадзій Янскі, у распараджэнні якога «Ягуар», і Юрый Масель – стараннаму работніку даверылі сёлета новы КВК-800. Для адвозкі зялёнай масы выдзелена дзесяць адзінак тэхнікі: велікагрузныя МАЗы і трактары з прычэпамі.

Механізатар Генадзій Янскі, галоўны ветурач Дзмітрый Аўчук і механізатар Мікалай Ус

Закладвалася траншэя на МТФ «Жыгалкі». На трамбаванні зялёнай масы задзейнічаны два пагрузчыкі, на якіх працуюць Генадзій Янскі (старэйшы) і Васілій Леўкавец, дапамагаў калегам Мікалай Ус. Адказны за нарыхтоўку кармоў – галоўны ветэрынарны ўрач Дзмітрый Аўчук. Дзмітрый Валянцінавіч адзначыў, што вільготнасць правяленай масы складае 50-55 працэнтаў.

Камбайнеры Юрый Масель (злева) і Генадзій Янскі

– Кожны дзень мы затрамбоўваем ад 800 тон да тысячы зялёнай масы, – расказвае галоўны аграном Аляксей Чандакоў. – Дзве траншэі, на МТФ «Пагарэлае» і МТФ «Грабёнаўшчына», ужо запоўнілі. Убіраем бабова-злакавыя сеяныя травы. Вынікі абнадзейваюць, бо некалькі апошніх гадоў мэтанакіравана працуем з травамі, набываючы  насенне самых перспектыўных відаў і сартоў, у тым ліку замежнай селекцыі. Закладваем з іх шматкампанентныя сенажаці. Сёлета пасеялі 100 гектараў, выкарыстоўваючы восем кампанентаў, і столькі ж – выкарыстоўваючы шэсць. Эксперыментуем. Практычна на кожным урочышчы ў нас растуць розныя травасумесі.

Механізатар Віталій Ждановіч

На касьбе траў задзейнічаны чатыры касілкі. Дзевяціметровы агрэгат даручылі Віталію Ждановічу, на астатніх касілках шчыравалі механізатары Яўгеній Матусік, Алік Крывашэй і Генадзій Недзень. На варушэнні зялёнай масы рупіўся Мікалай Ланкевіч з новымі граблямі SVR-13.

З першага ўкосу разлічваюць нарыхтаваць прыкладна шэсць тысяч тон сенажу.

Ёсць у пойме Нёмана і 526 гектараў натуральнага лугу. Дарэчы, сёлета кармы закладваюцца толькі сіламі работнікаў таварыства.

Надзея БАТАЛКА, фота аўтара



Добавить комментарий

Ваш e-mail не будет опубликован. Обязательные поля помечены *