Завадчане падтрымалі медыкаў

Важное Медыцына

Дабрачыннасць у філіяле ААТ «ККХ «ММЗ» у г. Стоўбцы – справа не новая, і нашы работнікі неаднаразова даказвалі сваю гатоўнасць падставіць плячо ў цяжкую хвіліну.

Неабыякавыя завадчане збіраюць сродкі на дарагое лячэнне, складаныя аперацыі, рэабілітацыю і догляд. І цяпер, падчас эпідэміялагічнай пагрозы, работнікі філіяла не змаглі не адгукнуцца на прапанову, якая паступіла ад адміністрацыі прадпрыемства, – арганізаваць дабрачынную акцыю для УАЗ «Стаўбцоўская ЦРБ» па барацьбе з COVID-19.

На спецыяльны дабрачынны рахунак бальніцы пералічана 3946,50 рубля. За іх закуплены сродкі індывідуальнай аховы для медыкаў.

Старшая медсястра райбальніцы, старшыня прафкама Святлана Высоцкая, галоўны ўрач ЦРБ Святлана Глебка, дырэктар філіяла ММЗ Леанід Маліноўскі і старшыня пярвічнай прафсаюзнай арганізацыі філіяла Вольга Мішук

– Спадзяёмся, што і наш удзел дапаможа медыкам справіцца з каранавіруснай інфекцыяй, якая можа закрануць кожнага, прыйсці ў любы дом, любую сям’ю, – адзначыў дырэктар філіяла Леанід Маліноўскі. – Сёння як ніколі важныя нашы згуртаванасць і падтрымка адзін аднаго. Медыцынскія работнікі штодзень сутыкаюцца  з небяспечным захворваннем, прымаюць на сябе асноўны ўдар у барацьбе з ім. Толькі разам мы зможам супрацьстаяць гэтаму выпрабаванню.

Дырэктар філіяла падкрэсліў:

– Медыкі – сапраўдныя героі сучаснасці, і мы шчыра ўдзячны ім за самаадданую працу, сілу духу, міласэрнасць, патрыятызм.

Галоўны ўрач Стаўбцоўскай ЦРБ  Святлана Глебка выказала калектыву філіяла словы ўдзячнасці за падтрымку, спагадлівасць, увагу і разуменне.

Сапраўды, добрыя справы не застаюцца незаўважанымі, і няхай яны вернуцца да завадчан моцным здароўем, росквітам і дабрабытам.

Аксана МАЧОНАЯ, спецыяліст па інфармацыі і рабоце з моладдзю ААТ «ККХ «Мінскі маторны завод» у г. Стоўбцы

Фота Наталлі КЛЫГАЧ



Tagged

Добавить комментарий

Ваш e-mail не будет опубликован. Обязательные поля помечены *