На прасторах Стаўбцоўшчыны

Нумары Ураджай-2014

image_pdfimage_print

УМАЛОТНЫ ЛУБІН

У ААТ «Каганец», які з’яўляецца элітгасам па вырошчванні лубіну, атрымана з гектара 51,1 цэнтнера зерня гэтай высокабялковай каштоўнай культуры. Высявалі суперэліту, ранняспелы беларускі сорт «Першацвет», і намалацілі амаль 90 тон эліты.

– Будзем рэалізоўваць насенне жадаючым, – сказаў галоўны аграном Дзмітрый Вашкевіч. – І надалей плануем займацца  вырошчваннем лубіну.

У ААТ «Вялікі Двор» зернебабовыя далі сёлета 49,9 цэнтнера. У ААТ «Агранёманскі», дзе імі засеялі 200-гектарную плошчу, намалочана 40 цэнтнераў,  найбольш ураджайнымі выдаліся аўсяна-гарохавыя сумесі.

 

ПЕРСПЕКТЫЎНЫЯ ГІБРЫДЫ

Кіраўнік фермерскай гаспадаркі «Сула» Уладзімір Радзевіч займаецца не толькі вырошчваннем бульбы. Высявае на сваіх палях збожжавыя культуры і рапс. У прыватнасці, летась пасеяў 90 гектараў азімага рапсу. Пасевы добра перазімавалі. Вясною расліны падкармілі і апрацавалі эфектыўнымі замежнымі прэпаратамі.

Ураджайнасць фермер атрымаў неблагую, намалочана 38 цэнтнераў масланасення з гектара. Уладзімір Уладзіміравіч расказвае, што высяваў два замежныя перспектыўныя гібрыды  –  нямецкі «Ситро» і амерыканскі «Экзекутив», а таксама два сарты беларускай селекцыі –  «Капітал» і «Дабрадзей». Вышэйшай ураджайнасцю аддзячыў амерыканскі гібрыд – на круг выйшла 42 цэнтнеры. Усё насенне, а намалочана звыш 340 тон, ужо рэалізавана спажыўцам. Гэтымі днямі ў гаспадарцы ўбіраюцца збожжавыя. Ураджай неблагі,  40-42 цэнтнеры з гектара. Задзейнічаны на жніве камбайн, на якім працуе Сяргей Ніканчук. Дарэчы, пакуль даспявалі ячмень і яравая пшаніца, камбайнер паспеў папрацаваць на збожжавых палетках суседняй гаспадаркі ААТ «Каганец». З кіраўніцтвам гэтай гаспадаркі ва Уладзіміра Радзевіча добрыя стасункі і ўзаемавыгаднае супрацоўніцтва.

 

ПЯЦЬ НОВЫХ КАМБАЙНАЎ

У пачатку ўборачнай кампаніі камбайнавы парк раёна папоўніўся пяццю новымі збожжаўборачнымі машынамі «КЗС-1218» айчыннай вытворчасці. Два «стэпавыя караблі» набыў ААТ «Вішнявецкі-агра». Даручылі новую тэхніку Аляксандру Якімовічу, для якога, у якасці камбайнера, гэтая ўборачная першая, і Віталію Шоду. У ААТ «Радзіма Якуба Коласа» камбайн атрымаў вопытны Уладзімір Пявец. Пакуль тэхніка была, так бы мовіць, у дарозе, Уладзімір Уладзіміравіч адвозіў на сваім трактары збожжа ад камбайнаў. Але з нецярпеннем чакаў камбайн, і адразу ж уключыўся ў работу. З задавальненнем прыняў новую тэхніку Сяргей Лабун з ААТ «Рубяжэвічы», які працуе на ёй разам з сынам Аляксандрам. А ў ААТ «Шашкі», як ужо паведамлялі раней,  ключы ўручылі Валерыю Калею.

 

ТАКТЫКА СЯБЕ АПРАЎДВАЕ

У ААТ «Шашкі» цярэбяць лён. На першых пятнаццаці гектарах выкарыстоўвалася свая тэхніка. Але яна недасканалая, яе патрэбна мяняць на сучасную. З гэтай мэтай дырэктар ААТ «Шашкі» Віталій Ільюшэнка дамовіўся з кіраўніцтвам ААТ «Валожынскі льнокамбінат» аб пастаўцы на выпрабаванне  льноўборачнага камбайна  «Ліда-U 30». Шчыруюць на палетках дзве такія машыны. І тактыка дырэктара зразумелая. Перад тым, як набыць тэхніку, Віталій Васільевіч хоча пабачыць яе ў рабоце непасрэдна на палетках таварыства. Нядаўна на выпрабаванні тут працаваў апырсквальнік.



Tagged

Добавить комментарий

Ваш e-mail не будет опубликован. Обязательные поля помечены *