Царкоўная служба з епіскапам

Нумары Соцыум

Святочныя дні Ражджаства Хрыстовага ў Стаўбцоўскім Свята-Аннінскім храме былі ўпрыгожаны прыездам епіскапа Маладзечанскага і Стаўбцоўскага Паўла. Першае знаёмства з правячым архіерэем адбылося нечакана: падчас урачыстага прыёму архіпастыра з хлебам-соллю Уладыка прыняў знакі гасціннасці і з любоўю ўручыў па ружы ўсім, хто яго сардэчна сустракаў: намесніку старшыні райвыканкама Сяргею Шэсцелю, іншым прадстаўнікам райвыканкама, старасце прыхода Сяргею Мураўёву, загадчыцы іконнай лаўкі Яўгеніі Горбач і іншым прыхаджанам. Такое благаславенне сагрэла ўсіх і зблізіла.

У гэты святочны дзень падчас Бажэственнай літургіі епіскапу Паўлу саслужылі благачынны протаіерэй Аляксандр Марцінчык і ўсе свяшчэннаслужыцелі Стаўбцоўскага благачыння, благачынны Маладзечанскай царкоўнай акругі протаіерэй Віталій Багданёнак са свяшчэннаслужыцелямі.

Пасля святочнай службы епіскап Павел адказаў на пытанні журналістаў.

–       Ваша Праасвяшчэнства, у чым асноўная мэта рэарганізацыі, у выніку чаго ў Беларускай Праваслаўнай Царквы з’явіліся новыя епархіі, у ліку якіх  Маладзечанская і Стаўбцоўская?

–       Свяцейшы Патрыярх Кірыл бачыць Царкву ў такім вобліку, што архіерэй павінен мець зносіны не толькі са сваімі свяшчэннаслужыцелямі, а таксама і з прыхаджанамі, каб была такая цесная сувязь. У маёй епархіі 118 прыходаў – кожны патрэбна наведаць, у кожным паслужыць, пагутарыць з прыхаджанамі. Колькі гэта зойме па часе? Гэта не было раздзяленне, як некаторыя думаюць, а ўзбагачэнне. Царква не дзеліцца, Царква памнажаецца. Гэтак жа як у нас растуць прыходы, мы ж не гаворым, што якісьці прыход раздзяліўся на два. Мы гаворым, што стварыўся новы прыход. Так жа мы не дзелім епархіі, а ствараем новыя, каб епіскап мог памножыць свяшчэннаслужыцеляў, свяшчэннаслужыцелі будуць будаваць новыя храмы. Патрыярх Кірыл сказаў, што храмы павінны быць у крокавай даступнасці да чалавека, каб яму не прыйшлося ехаць з аднаго канца горада ў другі, каб чалавек мог спакойна дайсці ад свайго дома да храма.

–       Уладыка, Стаўбцоўскі  храм, які ў 2015 годзе адзначае 190-годдзе, за сваю доўгую гісторыю не раз прымаў епіскапаў. Якія пачуцці, які настрой выклікала ў Вас наведванне нашай царквы?

–       Радасць адчуў. Мы пад’ехалі да храма з іншага боку, не з параднага, дзе мяне чакалі, што буду падымацца па прыступках. Я выйшаў з машыны, і мая душа ўзрадавалася: гэта сапраўды старадаўні  храм, вельмі дагледжаны дзякуючы настаяцелю айцу Аляксандру. У храме старадаўнія іконы. Святыя айцы гаварылі, што храм –  гэта кавалачак неба на зямлі. Уваходзячы ў храм, мы павінны ні на што не адцягваць увагу, і на малітву нас падзвігаюць святыя лікі.

Уладыка Павел цёпла павіншаваў прыхаджан са святам і паабяцаў, што будзе старацца часцей прыязджаць на службы.

У гэты дзень епіскап Павел пабыў і ў новым стаўбцоўскім Свята-Уваскрэсенскім прыходзе. Уладыка выказаў задаволенасць, як будуецца новы храм, яму спадабаўся праект і прыгожы выгляд царквы. Прыхаджанам новага прыхода Уладыка Павел наказаў берагчы свайго пастыра протаіерэя Віталія Шаркова, таму што такія свяшчэннікі на вагу золата.

Святлана ЖЫБУЛЬ

Фота Васіля ЗЯНЬКО



Tagged

Добавить комментарий

Ваш e-mail не будет опубликован. Обязательные поля помечены *