Цікавімся: як жа наш?

Нумары Спорт

image_pdfimage_print

Сапраўдным дэсертам для аматараў футбола напрыканцы года сталі заключныя матчы групавога этапу Лігі чэмпіёнаў краін Еўропы. Мацнейшая каманда Беларусі барысаўскі БАТЭ дастойна супрацьстаяла знакамітым ва ўсім свеце сапернікам. Няўдача ў сустрэчах з уладальнікам галоўнага трафея – Кубка чэмпіёнаў – была прадказальнай. Мала якой дружыне свету ўдаецца не стаць разгромленай іспанскай «Барселонай». Таму 0:3 і 0:2 у матчах з практычна зборнай футбольных зорак свету – вынік для барысаўчан не надта сумны. А вось у гульнях з германскім «Байерам» нашы здабылі ачко, перамаглі на сваім полі «Рому» – 3:2. І ў апошнім туры перамога над рымлянамі магла вывесці барысаўскі клуб у фінальную  стадыю спаборніцтваў.

За ходам матча «Рома»  –  БАТЭ з экранаў тэлевізараў сачылі, пэўна, мільёны гледачоў. Беларускія футбалісты не расчаравалі, дзейнічалі смела, агрэсіўна. На жаль, дзве літаральна стапрацэнтныя магчымасці забіць гол, яны не скарысталі. Не ўдалося адкрыць лік і футбалістам «Ромы». Вынік сустрэчы 0:0  не дазволіў нашым пайсці далей, але водгукі яны атрымалі самыя станоўчыя, пацвердзілі прагрэс беларускага футбола.

Стаўбчанам, безумоўна, было цікава: як будзе дзейнічаць наш зямляк Аляксандр Карніцкі. Свой шанц ён атрымаў у другім тайме, калі замяніў славутага Аляксандра Глеба, які ў сваёй футбольнай біяграфіі мае сезоны выступленняў за тую ж славутую «Барселону». Карніцкі стараўся, не раз быў у эпіцэнтры падзей, як мог дапамагаў партнёрам.

Уперадзе яшчэ доўгі спартыўны шлях. Пажадаем Аляксандру ўдасканальваць майстэрства, дабіцца права стаць членам зборнай каманды краіны.

Ф. ФЯДОТАЎ



Tagged

Добавить комментарий

Ваш e-mail не будет опубликован. Обязательные поля помечены *