Спёка, навальніца...

13 ліпеня  анамальная спёка абрушылася навальніцай з разбуральным ветрам.

Па даных раённага аддзела па надзвычайных сітуацыях, стыхія пакінула свае сляды  найбольш у паўднёвай частцы раёна  -  на тэрыторыі сельскагаспадарчых вытворчых кааператываў "Радзіма Якуба Коласа", "Вішнявецкі" і "Вялікі Двор".

У рознай ступені пацярпелі жывёлагадоўчыя фермы, склады і іншыя сельскагаспадарчыя пабудовы, а таксама дамы вяскоўцаў. Моцны вецер назрываў з дахаў шыферу. А ў Новай Вёсцы не вытрымалі пад яго націскам і старыя таполі. Дрэвы ўпалі і перагарадзілі дарогу. На шчасце, ніхто не пацярпеў. Падчас навальніцы ў многіх населеных пунктах раёна назіраліся лакальныя адключэнні электрычнасці.

Для ліквідацыі наступстваў стыхіі аператыўна працавалі аварыйныя брыгады РЭС, дарожнікі расчышчалі завалы.

Аднаўленне сарваных дахаў вытворчых памяшканняў вядзецца сіламі саміх гаспадарак. У іх створаны камісіі па надзвычайных сітуацыях, якія займаюцца ацэнкай памераў нанесеных страт.

Заўважым, што ў маштабах рэспублікі навальніца 13 ліпеня зафіксавана і як трагічны дзень. Сярод 57 пацярпелых і 341 абясточаных населеных пунктаў указваецца і чалавечая ахвяра. У Гомельскім раёне на пашы загінуў ад удару маланкі пастух 1989 года нараджэння. Акрамя таго, у Лідскім раёне пацярпеў ад  дрэва, якое ўпала, вучань 4 класа. Хлопчык адпачываў у лясным масіве.

Пр.