Чорны смутак Афгана

15 лютага, Дзень памяці воінаў-інтэрнацыяналістаў, на Стаўбцоўшчыне адзначаны шэрагам сустрэч і мерапрыемстваў.

Сёлета, у год 22-й гадавіны вываду савецкіх войскаў з тэрыторыі Афганістана, збор воінаў-інтэрнацыяналістаў (іх у нас амаль 100 чалавек), праходзіў традыцыйна ў райваенкамаце. Менавіта адсюль для васьмярых стаўбцоўскіх рабят, прызваных у армію, пачаўся шлях у Бессмяротнасць... Святочная калона накіроўваецца ў цэнтр горада да стэлы ў гонар воінаў-інтэрнацыяналістаў. Тут, ля прыгажунь-елачак, пасаджаных у памяць аб загінуўшых, праходзіць мітынг. Піянеры нясуць ганаровую варту. Эмацыянальныя словы ўдзячнасці воінам, якія, рызыкуючы жыццём, выконвалі свой доўг у чужой краіне, наказ берагчы мір на зямлі гучалі з вуснаў намесніка старшыні райвыканкама Сяргея Шэсцеля, раённага ваеннага камісара Вячаслава  Воранава, старшыні раённай ветэранскай арганізацыі Іосіфа Язвінскага, старшыні раённай арганізацыі ветэранаў вайны ў Афганістане Рыгора Мамайкі. Начальнік аддзела па справах моладзі Настасся Віслаўская прадастаўляе слова для выступлення старшыні раённай арганізацыі партыі камуністаў Ніне Дубовік, ад імя стаўбцоўскай моладзі - дзесяцікласніцы ДАСШ № 2 Дар'і Манцывода. Пасля прачулых вершаваных слоў да падножжа стэлы ўскладзены жывыя гваздзікі і вянкі.   

Далей калона рушыла ў кінатэатр "Беларусь", дзе адбыўся канцэрт з удзелам ансамбля Шашкоўскай школы мастацтваў "Святліца", дэманстрацыя дакументальнай стужкі пра Афганістан, а таксама відэаролікаў выступлення членаў раённага клуба "Абаронца Айчыны". Падлеткі, якія займаюцца ў гэтым клубе, паказалі элементы рукапашнага бою  непасрэдна перад прысутнымі ў кінатэатры. Воін-інтэрнацыяналіст Рыгор Мамайка з'яўляецца старшынёй клуба, створанага ў Стоўбцах сем гадоў таму. Рыгор Андрэевіч заўважыў:

- Наша раённая афганская арганізацыя ў першую чаргу павінна займацца ваенна-патрыятычным выхаваннем моладзі. У сучасных умовах гэта справа надзвычай важная. Нельга не выкарыстоўваць патэнцыял воінаў-інтэрнацыяналістаў, якіх разглядаюць як нашчадкаў традыцый ветэранаў Вялікай Айчыннай. Наш клуб, несумненна, будзе развівацца. Вялікую падтрымку гэтаму мы адчуваем з боку раённага выканаўчага камітэта. Больш актыўна  будзем весці  патрыятычную работу сярод вучняў школ. У клубе, паверце, знойдзецца справа для кожнага  воіна-інтэрнацыяналіста.  І тады мы сапраўды зможам гаварыць пра сваю арганізацыю як пра дзейсную, моцную  баявым брацтвам і дружбай... 

Напярэдадні Дня памяці воінаў-інтэрнацыяналістаў не забытымі аказаліся і бацькі  загінуўшых воінаў-інтэрнацыяналістаў. У іх пабывала дэлегацыя раёна. Раённы выканаўчы камітэт выдаткаваў кожнай з іх 200 тысяч рублёў, на працягу года аказвалася і іншая дапамога.

Памяць жыве ў справах.