Адвесці ад дзяцей хваробу

Да дня прафілактыкі туберкулёзу ў цэнтральнай раённай бальніцы была праведзена прамая лінія з урачом-фтызіятрам Марыяй Санкевіч. Мы папрасілі Марыю Аляксандраўну абагуліць усе пытанні і зрабіць акцэнты на самых важных момантах у прафілактыцы гэтага небяспечнага захворвання.

- Сёння стала відавочным, што пагроза эпідэміі туберкулёзу - рэальнасць. Па звестках Сусветнай арганізацыі аховы здароўя, хворых на туберкулёз у свеце сёння больш, чым 20 гадоў назад. Не выключэнне і наш раён. Калі ў першым квартале 2010 года былі выяўлены 2 хворыя з актыўнай формай туберкулёзу, то з пачатку бягучага года - ужо пяць. Высокая распаўсюджанасць туберкулёзу сярод дарослага насельніцтва садзейнічае штогод інфіцыраванню дзяцей. Таму вельмі важна і актуальна гаварыць сёння аб прафілактыцы гэтага небяспечнага захворвання.

- Які метад з'яўляецца асноўным пры выяўленні туберкулёзу ў дзяцей і падлеткаў?

- Асноўным метадам з'яўляецца туберкулінадыягностыка, заснаваная на прымяненні туберкулінавай пробы Манту, якая ставіцца штогод, пачынаючы з 12-гадовага ўзросту да 17 гадоў: у цотныя гады - на правай руцэ, у няцотныя - на левай. У дзіцяці, інфіцыраванага ўзбуджальнікам туберкулёзу, месца ўнутрыскуранога ўвядзення туберкулёзу праз суткі-трое чырванее і прыпухае, г. зн. выяўляецца станоўчая туберкулёзная проба. Момант пераходу адмоўнай туберкулёзнай пробы ў станоўчую з'яўляецца сігналам для абследавання падлетка ці дзіцяці ў супрацьтуберкулёзным кабінеце для своечасовага выяўлення ранніх прыкмет туберкулёзу і яго папярэджання.

- Якія асноўныя шляхі заражэння туберкулёзам у дзяцей?

- Заражэнне туберкулёзам у дзяцей, так жа як і ў дарослых, адбываецца двума шляхамі: паветрана-кропельным і аліментарным. Пры першым адбываецца ўдыханне кропель свежай макроты ці пылінак, якія ўтрымліваюць сухую макроту хворага на туберкулёз. Пры другім - праз ежу пры ўжыванні некіпячонага малака ад хворай на туберкулёз каровы ці пры выкарыстанні агульнага з хворым на туберкулёз чалавекам посуду.

- Якія спосабы прафілактыкі туберкулёзу ў дзяцей?

- Вакцынацыя і рэвакцынацыя Буж і Буж-м з'яўляюцца асноўным метадам спецыфічнай прафілактыкі туберкулёзу ў дзяцей і падлеткаў. Вакцынацыя праводзіцца на 3-4 дзень жыцця, рэвакцынацыя - у 7-гадовым, потым - 14-гадовым узросце. Другім метадам папярэджвання туберкулёзу з'яўляецца хіміяпрафілактыка. Яна праводзіцца асобам, якія знаходзяцца ва ўмовах вялікай небяспекі - у пастаянным кантакце з хворымі на адкрытую форму туберкулёзу, дзецям з "віражом" туберкулёзнай рэакцыі, і тым, хто інфіцыраваны туберкулёзам. Пры хіміяпрафілактыцы прымяняецца ізапіязід. Працягласць хіміяпрафілактыкі складае 2-3 месяцы. Для аздараўлення інфіцыраваных дзяцей ёсць Барысаўская санітарна-лясная школа, у якой створаны выдатныя ўмовы для пражывання і аздараўлення дзяцей.