У чаканні вясны

Па выніках раённага агляду-конкурсу машынна-трактарны парк ААТ "Жацерава" заняў першае месца сярод аднатыпных падраздзяленняў сельгаставарыстваў раёна. І лепшымі ў плане навядзення парадку на тэрыторыі і ў мехмайстэрні, гатоўнасці рамонтнай базы да работы ў зімовых умовах яго працаўнікі сталі па праву. Варта адзначыць, што гэтаму падраздзяленню шмат увагі ўдзяляе і дырэктар Іван Краўчук. Інжынер па адукацыі, Іван Васільевіч дасканала разбіраецца ў тэхніцы.

Прыемна кінуць позірк на тэрыторыю мехдвара - яна поўнасцю асфальтавана, пастаянна тут падтрымліваецца парадак, разбіты кветнік. На перыяд масавых палявых работ наладжаны і строгі кантроль за рухам транспарту -  на тэрыторыю мехдвара без дазволу  не заедзе ніводная машына, акрамя, зразумела, тэхнікі таварыства.  Нядаўна праведзены рамонт у кабінеце па ахове працы і бяспецы дарожнага руху, зараз шыкуецца дыспетчарская.

Рамонтная майстэрня светлая і прасторная, аснашчана неабходным абсталяваннем. Тут зроблена ацяпленне на мясцовых відах паліва, таму нават у моцныя маразы ў памяшканні падтрымліваецца належны тэмпературны рэжым.

- Летась мы правялі рэканструкцыю - адрамантаваны кран-бэлька, аглядавая яма, зманціравана асвятленне, - сказаў галоўны інжынер Віктар Іванец. - Абсталяваны таксама пакой для прыёму ежы і адпачынку механізатараў.

З восені ўся пасяўная і глебаапрацоўчая тэхніка была своечасова пастаўлена на зімовае захоўванне,  зараз вядзецца яе рамонт. Гэтымі зімовымі днямі механізатары скрупулёзна рыхтуюць і свае трактары да веснавых палявых работ.

- Многа ў гаспадарцы за апошні час набыта новай тэхнікі, - даводзіць загадчык майстэрні Дзяніс Скачко, -  але і яна пасля напружанага сезона патрабуе догляду. Трэба даводзіць да ладу і ўжо не новую, якой асаблівая ўвага. Над гэтым і працуем. Дапамагаюць механізатарам газаэлектразваршчык Анатоль Кузьміных, слесары Уладзімір Капусцік і Арцём Кандраценя. Старанныя хлопцы  выконваюць не толькі сваю асноўную работу -  няма ў нас каваля, дык яны і кавальскую справу асвоілі. 

Штогод у таварыстве рамонт тэхнікі звычайна праводзіцца сваімі сіламі і завяршаецца ў вызначаны тэрмін, бо работнікі ведаюць, што вясна чакаць не будзе.

На здымках: галоўны інжынер Віктар Іванец (справа) і механізатар Аляксандр Ганчарэнка вызначаюць аб'ём работы.

Фота Васіля ЗЯНЬКО