Хто ў адказе за жалезны век?

Асобны накірунак работы аддзела культуры райвыканкама - ахова помнікаў, якія занесены ў Дзяржаўны спіс гісторыка-культурных каштоўнасцяў Рэспублікі Беларусь. Адказвае за гэты ўчастак работы ў нас у раёне метадыст аддзела культуры Наталля Радомская. За апошнія два гады ёю праведзена  вялікая работа па падрыхтоўцы ахоўных абавязацельстваў новага ўзору на ўсе  аб'екты - іх 21, а таксама пашпартоў і ўліковых картак.

У ходзе гэтай работы ўпарадкавана і дакументацыя па ведамаснай прыналежнасці гісторыка-культурных каштоўнасцяў, у першую чаргу гэта датычыць помнікаў археалогіі. Іх на тэрыторыі раёна 8. Паводле  новай дакументацыі  адказнасць за захаванне помнікаў накладваецца на  арганізацыі, на чыёй тэрыторыі яны знаходзяцца.

Так, у ведамства Рубяжэвіцкага лясніцтва перайшло Гарадзішча перыяду жалезнага веку. На тры курганы са статусам гістарычнай каштоўнасці, якая ахоўваецца дзяржавай, папоўнілася лясная скарбніца Апечкаўскага лясніцтва. Адзін помнік археалогіі ў Васілеўшчыне перайшоў з ведамства Літвенскага сельвыканкама адкрытаму акцыянернаму таварыству "Рочавічы". Акінчыцкае лясніцтва прыняло на 269-гектарнай плошчы Коласаўскі заказнік з чатырма мемарыяльнымі сядзібамі і мастацка-мемарыяльным комплексам драўляных скульптур "Шлях Коласа".

З ведамства Мікалаеўшчынскага сельвыканкама ААТ "Радзіма Якуба Коласа" перайшлі паселішча і стаянка перыяду каменнага веку, ААТ "Вішнявецкі-агра" - паселішча і стаянка каменнага і бронзавага вякоў.

У ходзе гэтай няпростай работы па правільным афармленні дакументаў у іншым ведамстве цяпер брацкая магіла на Плошчы Бессмяротнасці ў райцэнтры і магіла Авяніра Касценчыка на гарадскіх могілках -  цяпер за іх адказвае аб'яднанне камунальных службаў.

Ведамствы, на тэрыторыі якіх знаходзяцца аб'екты са статусам нацыянальнай каштоўнасці, нясуць адказнасць перад дзяржавай за іх належнае ўтрыманне.