Прадпрыемства дапамагло вярнуць дзяцей

На мінулым тыдні адразу ў дзве сям'і на тэрыторыі Варацішчанскага сельсавета вярнуліся дзеці з дзіцячага сацыяльнага прытулку.

Такое рашэнне прынялі члены камісіі па справах непаўналетніх, якім разам з іншымі зацікаўленымі службамі і арганізацыямі прыйшлося нямала "павазіцца" з гэтымі бацькамі. Але вынік сапраўды радуе, калі бачыш гэтых людзей цвярозымі, з пасвяжэўшымі тварамі, а, галоўнае, - усведамляеш, што ўжо зроблена іх рукамі для дзяцей. Наведзены парадак у доме, закуплены прадукты і набыта мэбля. У адной з сем'яў дзіця чакае па вяртанні дарагі сюрпрыз - камп'ютар.     

- У даным выпадку для аздараўлення сітуацыі ў гэтых сем'ях зрабіла свой уклад і дырэкцыя ААТ "Жацерава", -  падкрэсліла намеснік старшыні камісіі Наталля Хвасько. - За свой кошт прадпрыемства пралячыла пяцёра чалавек у абласным наркадыспансеры.

Зразумела, што з таго, хто не ўжывае спіртнога, выходзіць не толькі добры бацька ці матуля, але і работнік. Так, адну з жанчын, якая прайшла лячэнне, ужо перавялі з паляводаў у даяркі. Адпаведна, вырас яе заробак, і гэта адчула ўся сям'я. Цяпер можна падумаць і пра пакупку аўтамабіля. Чым не мэта для шчаслівай маладой сям'і?!

Цяпер усе спадзяванні  на тое, што дарога ў ранейшае жыццё ў гэтых сем'ях канчаткова адрэзана. "Шанц даецца толькі адзін раз. Другі раз -  гэта суд і працэдура пазбаўлення бацькоўскіх правоў", -  папярэдзіла бацькоў, да якіх вярнуліся дзеці, Наталля Хвасько.