Поспех жывёлаводаў

НА ПЕРАДАВЫХ ПАЗІЦЫЯХ

Неблагім на здабыткі выдаўся мінулы год для работнікаў ТАА СЖК "Налібакі". На малочнатаварных фермах надоена 6976 тон малака, што склала 104,6 працэнта да мінулагодняга паказчыка. У сярэднім ад кожнай каровы атрымана па 7666 кілаграмаў малака, плюс 69 кілаграмаў. Варта адзначыць, што ў малочных справах таварыства з году ў год на перадавых пазіцыях. Летась спрацаваў няблага і мясны цэх, забяспечаны найвышэйшы у раёне паказчык па вытворчасці мяса на 100 гектараў сельгасугоддзяў.

За гэтымі вынікамі напружаная праца жывёлаводаў на чале з галоўным заатэхнікам Уладзімірам Чарняўскім, які  ўзначальвае галіну на працягу дзесяці гадоў. А ў жывёлагадоўлі ён рупіцца дзевятнаццаць гадоў. Прыйшоў на працу ў гаспадарку, на той час калгас "Налібоцкі", пасля заканчэння Смілавіцкага сельскагаспадарчага тэхнікума. Адразу працаваў загадчыкам фермы ў Целяхах, а затым - на свінаферме. Прафесія нялёгкая, але выбраў яе Уладзімір Іосіфавіч свядома. З маленства дапамагаў бацькам, якія працавалі на ферме, а пасля службы ў арміі вырашыў звязаць сваё жыццё з сельскай гаспадаркай. Плён працы спецыяліста не заставаўся незаўважаным - за сваю шчырую работу ён неаднаразова ўзнагароджваўся,  а сёлета фотаздымак галоўнага спецыяліста занесены на раённую Дошку гонару.

Сярод фермаў лепшая па выніках МТФ "Церабейнае"(брыгадзір Вольга Мазун), дзе надоена ў сярэднім ад кожнай каровы па 8115 кілаграмаў малака.

На МТФ "Цэнтр" працуе вядомая не толькі ў раёне аператар машыннага даення Валянціна Мусік, якая паступова набліжаецца да дзесяцітысячнага рубяжу, маючы паказчык  9909 кілаграмаў. Шчыра рупяцца даяркі Святлана Рынкевіч, Ганна Міхно, Алена Шапялевіч і Наталля Банадысева, якія перасягнулі васьмітысячны надой, а таксама з высокімі вынікамі завяршылі мінулы год Алена Вялічка, Святлана Даргевіч, Алеся Дубіцкая і Алена Гаптар.

Вылучаны пераможцамі раённага спаборніцтва два майстры ў мясной справе.

Гэта аператар па адкорме свіней Галіна Чыжэўская і аператар па абслугоўванні свінаматак з парасятамі Ядвіга Дошчачка. На свінагадоўчай ферме вырашчана за мінулы год 799 тон мяса, плюс 69 тон да леташняга паказчыка.

РУПЛІВІЦА

Упершыню ў гісторыі ААТ "Каганец" аператар машыннага даення  МТФ "Ячонка" Тамара Тарасевіч атрымала ад кожнай каровы сваёй групы па 7073 кілаграмы малака і прыбавіла больш за дзве тоны да леташняга паказчыка.

Тамара Міхайлаўна лічыць, што поспех абумовілі некалькі фактараў.

- Травяных кармоў нарыхтавалі дастаткова і якасных, - даводзіць жанчына, - даём каровам камбікармы і розныя дабаўкі. Да таго ж, у мінулым годзе папоўніла групу пяршачкамі, раздаіла іх. Малочніцы даюць ад 20 да 30 літраў малака штодзень. Цялушак вырошваем на сваёй ферме, тэхнікам-асемянатарам у нас працуе Галіна Канатка.

Сціплая жанчына, яна не згадала толькі пра свае рупнасць і старанне, якія і сталі галоўнымі фактарамі ў дасягненні высокага выніку. Тамара Міхайлаўна дваццаць два гады працуе на ферме. Заўсёды была ў ліку лепшых, і яе запрашалі ў раён на ўшанаванне. Толькі вось паказчык быў невысокім.

Яна даводзіць, што цяпер і працаваць лягчэй, бо ўстаноўлены малакаправод. Летась перакрылі дах і адрамантавалі вокны ў кароўніку, зманціравалі энергазберагальныя лямпы, а сёлета абяцаюць палепшыць і бытавыя ўмовы.

Тамара Тарасевіч заняла першае месца ў раёне сярод аператараў машыннага даення ў другой групе, ферма "Ячонка" стала лепшай, ды і таварыства ўвогуле ў малочных справах на першай пазіцыі.